Курс Global Mini MBA – Кіраванне малым бізнесам, распачаты ў кастрычніку 2022 года, завяршаецца. 25 лютага на заключнай сесіі удзельнікі прадставяць свае праекты.
Студэнты курсу атрымалі комплексныя веды ў галінах менеджменту, фінансавага аналізу, маркетынгу і лічбавай трансфармацыі. Дзякуючы беларускім трэнерам, праграма дастасаваная да беларускага кантэксту. Напрыклад, на мінулым тыдні праводзіліся заняткі пра асаблівасці падаткаабкладання ў Беларусі.
“Мы пазнаёміліся з фінансавым аналізам, гэтая тэма вельмі істотная для развіцця бізнесу. Як аналізаваць рынак, пошук і ўтрыманне кліентаў, як рабіць рэкламу і што змянілася падчас пандэміі – гэта вельмі актуальныя і звышпатрэбныя рэчы”, – кажа Дзмітры, прадпрымальнік з Віцебску.
Курс быў арганізаваны ВБЎ разам з Centrum Rozwoju Biznesu Wydziału Zarządzania Uniwersytetu Łódzkiego пры падтрымцы European Union in Belarus і Solidarity Fund PL.
Даведка.
Курс “Global Mini MBA – Кіраванне малым бізнесам” вельмі папулярны ў Польшчы. Гэта 133-гадзінная праграма па менеджменце без атрымання ступені для бізнесменаў, прадпрымальнікаў і ўласнікаў малых і сярэдніх прадпрыемстваў, а таксама супрацоўнікаў новаствораных фірмаў. Яна ахоплівае ключавыя вобласці стварэння і развіцця прыватнага бізнесу з акцэнтам на сучасныя веды і ўдасканаленне практычных менеджарскіх навыкаў. У рамках ВБЎ рэалізуецца другі раз.
